Rinhlelhna atanga Rinnghehna

Zing dar rukah ka phone a rawn ri a.ka alarm emaw tia off ka’n tum chu, ka pa call a lo ni reng mai a.Mutchhuak deuh chung chuanka phone chu ka’n pick up a.Ka pa’ thu min rawn hrilh chuan min thawng kher mai.Ka harh zawk a, ka mittui a luang nghal zawih zawih a, ka thaw a pik em em a,awmngaihna pawh ka hre lo va.class kal pawh ka phur lo zo vek. “Aw Lalpa, engatinge keini kher?” tih chu ka rilrua zawhna hriatthiam har ka tih em em mai chu a ni.

Ka pa chuan zana kan in a kan thu min rawn hrilh a.Engkim a kang ral vek tih ka hriat chuan ka tap tawp a.Hrehawm ti chung chungin, “Ka pa, a tul chuan ka lo haw mai ang e, ka zir tawh lo mai ang.In sak leh te a ngai dawn sia, pawisa a hautak awm em mai, ka zirna a to si,” tiin ka chhang a.Chuta ka pa min chhanletna chuan ka rilru a khawih kher mai. “Lungngai suh, pathian a awm a lawm, khawvela kan ro te chu kan thihsan vek tur tho a nia; vana kan ro hlu ber kan neih a pawimawh zawk.Kan harsa deuh a nih pawhin I zirna tur chu Lalpa’n rem a tih chuan kan nei tho ang.in pawh min la pe leh em em ang,” tiin min chhang a.Khawvel thil zawnga ngaihtuah chuan hriatthiam har ka ti khawp mai.A hrehawm tih loh rual a ni hek lo.Kei ringtu inti ve pawh hian rinhlelhnate ka nei deuh rum rum a.Tawngtai pawh har ka ti ta khawp mai.Mi in te pawh a kang fova, mahse kan in a kan meuh chuan ka lak dan a dang ta tlat mai le.

Chutia awmngaihna hre lo leh rilru hah taka ka awm lai chuan ka rilruah Bible chang “ Johana 2:15-Khawvel hi hmangaih suh ula, khawvela thil awmte pawh hi hmangaih hek suh u.Mi tupawhin khawvel hi a hmangaih chuan Pa a hmangaihna amahah a awm lo,” tih hi a rawn lang hlawl a.

Lalpa ringtute hi Lalpa hian kan harsat ber lai pawhin min lo thlamuanin min lo awmpui reng a nih hi.Mangan laia tanpui vartu hnai reng a nihzia a takin ka nunah min rawn hmuhtir leh a.Hlimna leh lawmna aiin harsatna leh hrehawmna atang hian Pathian hnaih hi a lo awlsam zawk a ni.Ka tawngtai thei ve ta a, ka han tawngtai zo zet chu ni danga ka lo en liam mai mai ka khum bula DMTI thupui “1Josua 1:9-thu ka pe che a ni lawm ni? Chak tak leh huai takin awm rawh; hlau suh la, zam hek suh; Lalpa I Pathian chu I kalna apiangah i hnenah a awm zel dawn a lawm,” tih ka tar ka han hmuh chuan ka rilru a hneh kher mai.Harsatnaah ah pawh chak tak leh huai taka kan awm a tulzia leh Lalpan min awmpui reng a ni tih ka hre chhuak a.Mihring mihrinna chuan thei lo thin mah ila, Lalpaah chuan engkim mai hi a lo theih vek si a.Bible ah chiang takin a lo inziak reng mai. “Mathaia 19:26-Tin, Isua’n anni chu a en a, an hnenah, Chu chu mihring tan tih rual a ni lova; Pathian nen erawh chuan engkim tih theih a ni.” A ropui ka ti khawp mai!

Joba nun te kha ka ngaihtuah let a.Lalpa tana a lo rinawmzia kha ava ropui tak em! A ro zawng zawng a chan a, a fate a chan bawk a. Chu mai a ni lo, a taksa nasa takin a pan bawk a. A nupui meuh pawhin Pathian sawichhiaa thih mai a thlanpui zawk paw’n Lalpa phatsanna thinlung erawh a pu chuang hauh lo. Phatsan a hnehin tihian a ti a nih kha. “Joba 13:15-Mi tihhlum hial mahsela, amah chu ka nghak cheu vang.” Lalpa tana a rinawmna avangin a tawpah Lalpa’n a letin malsawmna a vur zawk tih Bible ah kan hmu a. Hla paw’n, “Mahse Lal remruat hian, lei mi dan a khum zo, ni li paw’n tlai se a hunah a thleng ava ropui em!” a tih kha a lo va han dik tehlul em! Keini tawrh zawng Joba tawrh nen tehkhin chuan nep tak a ni.Kan chhungkua kan la damtlang hi a va hlu em!

Pathian hian harsatnate hi amah kan hnaih theih nan kan chungah a lo thlentir fo thin a. Amah hi kan mamawh ber a ni tih hi khawvel ro paihthlaa amah chauh kan neih hma chuan kan hre lo thin. Lalpa ringtute hian khawvela ro hlu ber amah kan nei reng a, mahse kan ring lo thin a ni. Lalpa nge kan thlan dawn khawvel thil te? Kan thlan zawk chuan kan thlan loh zawk a paih bo hmak dawn si a. Lalpa hi kan nun atangin bo ta hmak se, khawvel ro zawng zawng hi nei mah ila engnge a hlutna awm ang? Tih hi mi tinte rilruah zawhna lian ber ni se ka duh a ni.

A tawp nan sap hla thu ka duh deuh mai tarlan ve ka duh a. Mizo tawngin ka let lo mai ang e-a awmzia ka let bo vek palh ang tih ka hlau……….
"If you are facing a trial like you have never faced before, and you feel like you just cannot take it anymore. Just remember God will not allow more than you can bear. You are not alone. God is with you. If you just trust in God you will make it through.”

**(He article hi DMZP Newsletter "RIHNIM" ah 7th February 2010 khan min chhuahsak tawh a, mahse ka thiante lo chhiar ve atan ka blog ah ka rawn post leh ani)**