Fel/Sual???

Hman ni chu ka thianpa hian mi pakhat a fak chiam mai a. Fel a tih zia leh rilru tha a tih zia chu a sawi uar hle a. Ka thianpa chu ka han zawt a. A mi fak nen chuan an lo inkawm ngai miah lo a. An lo inhre ve satliah chauh a. “Chuti si engtinnge a fel zia leh a rilru that zia I hriat a?” ka han ti chu ani chuan “Ele! A fel hmel em a, a zahzum hmel si a, a tawng tlem si a” zuk ti thla ngawt a mawle!!

In ka haw chu ka thianpa thil sawi ngawt mai chuan ka rilru a luah khat a. Mihring hi an lan dan atang hian an fel nge sual tih hi kan lo “JUDGE” fo mai thin a ni tih (hriatsa) min hriat chhuah thar tir leh a. Kan lan dan te hi chu Pathian siam a ni a, tih danglam theih a ni tawh si lova, “fel hmel lem lo, mi tawngduh, mize ngawichawi hranlo chu miin sual an va ti dawn em awww..” tiin ka ngaihtuah neuh neuh a.

Mihring hi Pathian hian inang vekin min siam lova, inang vekin min siam se zawng khawvel “BORING” dan tur chu!! Mihring inang vek hi awm khawm ta mup mup ila, hmel pawh inang, mizia pawh inang, engkim inang han awm khawm chu a ninawm hle ta ve ang. Chutiang khawvel “BORING” tak mai chu kan duh a nih si loh chuan FEL/SUAL kan teh dan leh kan ngaihdan te hi kan “CHANGE” a va han hun tawh tak em!!

FEL/SUAL kan tehna hi engnge?

Pawn lam lan dan ah mai hian em ni?

Hnai lo ve!!! Pathian kan rinna ah te, kan hnathawh dan ah te, lehkha kan zir dan ah te, society tana kan inpekzawh dan ah te, rinawmna lamah te, dikna ah te, thatna ah te, huaisenna ah te, aia upa zah dan leh nu leh pa te thuawih dan ah te leh tehfung thra dang te hian inteh zawk ta ila chuan kan changkang chak sawt lawng maw? Mi fel nih duh vang ngawtin em ni kan inkhawm thin a, thilpek te kan pek thin? Mi ngaihsan duh vangin em ni Pathian rawngbawlnaa kan inbarh luh thin? Hruaitu nih duh vang ngawtin em ni kohhran leh pawl tan thahnem kan ngaih thin? Kohhran leh society ah kan nihna zawng zawng hi hlip thla vek dawn ta sela, Pathian rawngbawl turin kan fel chhunzawm peih zel ang em?

Kan hriat reng tura pawimawh ka tih em em chu Pathian pawh hian kan pawn lam lan dan atangin min “JUDGE” lova, kan thinlung hi a ni, a fiah zawk thin ni. {Jeremia 17:9 Kei LALPA hi mi tin, an awm dan ang zel leh an thiltih rah ang zela pe tura rilru en chhuaktu, thinlung fiahtu ka ni.} Chuvangin keini mihring te pawh hian pawnlam lan dan ah “JUDGE” mai lovin tehfung dik leh rin tlakte hmanga in enfiah theuh a hun tawh takzet a ni.

Mite thatna aia an chhiatna sawi nuam kan ti fo thin hi a fuh ber lo. {Thufingte 10:11 Mifel ka chu nunna tuikhur a ni a mi suaksual ka erawh chu nunrawnnain a tuam.} Mi famkim lo te hian mite famkim lohna te hi endawng sak mai lovin chawikan I tum zawk ang u. Pathian mitah chuan ang khat vek kan ni a, mite felna/sualna a buai buai lovin mahni I in enfiah theuh zawk thin ang u.